گرده‌كانی ده‌ور و پشتی شـــارى سليمانى

گرده‌كانی ده‌ور و پشتی شـــار

شوێنی شاری سلێمانی به‌قه‌دپاڵی چیای گۆیژه‌وه‌ هه‌ڵبژێراوه‌, له‌ دووره‌وه‌ هه‌میشه‌ چه‌شمه‌ندازی چیـــای به‌رزی پیره‌مه‌گرون كه‌ (٢٦٧٠م) به‌رزه‌ و لای خۆرئاوایه‌وه‌ چیـــای گڵـــه‌ زه‌رده‌ دیاره‌.
شوێنی كۆنی سلێمانی له‌ سه‌ره‌و لێژی خوار گۆیژه‌دا هه‌ڵبژێردراوه‌: به‌ڵام ده‌وروپشتی شاری كۆن. كۆمه‌ڵی گرد بوو, كه‌ له‌سه‌رده‌می دامه‌زراندنی شاردا شوێنی كشتوكاڵ بوون و ورده‌ ورده‌ هه‌ندێكیان بوون به‌ گۆرستان له‌گه‌ڵ گه‌وره‌ بوونی شاردا, زۆربه‌ی ئه‌و گردانه‌ بوون به‌ خانوو , كه‌واته‌ ده‌توانین بڵێین شاری سلێمانی ئێستا چوار ده‌وری به‌ چیا ته‌نراوه‌ شاره‌كه‌ خۆی له‌سه‌ر كۆمه‌ڵه‌ گردێكه‌ كه‌ ناویان به‌م جۆره‌ لێنراوه‌:
١ ـ گردی حــاجی ئه‌وڵا ـ پشتی باخی شێخ له‌تیف.
٢ ـ گردی ناوه‌راست, پێشیان ده‌وت گردی سه‌ید عه‌بدول كه‌ریمی كاسه‌ و كه‌وچك, چونكه‌ ئه‌و زاته‌ی لێ‌ نێژراوه‌. به‌رامبه‌ر گردی حاجی ئه‌وڵا ته‌نیشت ڕێگا كۆنه‌كه‌ی هه‌ڵه‌بجه‌.
٣ ـ گردی سه‌یوان: ته‌نیشت گردی ناوه‌راست و شێخ مارفی نۆدێ‌ باوكی كاك ئه‌حمه‌دی شێخی لێ‌ نێژراوه‌.
٤ ـ گردی شێخ حسێنی قازی كه‌ پێشی ده‌ڵێن گردی شێخه‌ بچكۆله‌, چونكه‌ ئه‌و دوو زاته‌ی لێ نێژراوه‌, ( شێخ حسێنی قازی) خوشكه‌زای كاك ئه‌حمه‌دی شێخه‌ و (شێخ محمد: شێخه‌ بچكۆله‌) كوڕی كاك ئه‌حمه‌دی شێخ ئه‌كه‌وێته‌ پشتی گردی سه‌یوانه‌وه‌.
٥ ـ گردی گوڵان : پێشی ده‌ڵێن گردی مامه‌ یـــاره‌, چونكه‌ له‌سه‌ر ئه‌و گرده‌ نێژراوه‌ پشتی كارێزی وه‌ستا شه‌ریف.
٦ ـ گردی گاوران : پێشی ده‌ڵێن گردی ئه‌ڵه‌مانه‌كان, چونكه‌ گۆرستانی گاوره‌كانه‌, له‌ پشتی گردی شێخ حسێنی قازییه‌وه‌.
٧ ـ گردی هۆمه‌ره‌ كوێر: له‌ نێوان گردی سه‌یوان و گوندی قرگه‌دایه‌.
٨ ـ گردی سه‌لیم به‌گ: له‌پشتی گردی گاورانه‌وه‌یه‌ له‌سه‌ر رێگای قرگه‌.
٩ ـ گردی كانی شه‌كراو : له‌ پشتی گردی سه‌لیم به‌گه‌وه‌یه‌.
١٠ ـ گردی سووتاو یـــان گرده‌ گڕوێ‌ : شوێنی كانی به‌ردی مه‌ڵكه‌ند ییه‌كانه‌, ده‌كه‌وێته‌ پشتی تانكی ئاوه‌كه‌ی سه‌روو شار. ته‌نیشت (گوندی ئه‌ڵمانی ئێستا) .
١١ ـ گردی صالحی مه‌حمود ته‌نیشت گردی ده‌باشان به‌ره‌و رۆژهه‌ڵات (نزیك گوندی ئه‌ڵمانی ئێستا).
١٢ ـ گردی ده‌باشان: ئه‌میش له‌ ته‌نیشت گردی صالحی مه‌حموده‌وه‌یه‌. (شوێنی میوانخانه‌كه‌ی ئێستای مام جه‌لال)
١٣ ـ ناوگردانی خواروو پشتی سه‌روو كوردساتی ئێستا نزیك ده‌ربه‌نده‌كه‌یه‌.
١٤ ـ ناو گردانی سه‌روو : كه‌ پێی ده‌ڵێن دۆڵه‌ میران له‌ پشتی ناوگردانی خواره‌وه‌یه‌.
١٥ ـ گردی كانیه‌ به‌هاره‌: ئه‌م گرده‌ ده‌كه‌وێته‌ پشتی دۆڵه‌ میران.
١٦ ـ گردی جۆگا : له‌ به‌رامبه‌ر شه‌خسی شێخ جافره‌وه‌یه‌. شوێنی سه‌رۆكایه‌تی گشتی ته‌ندروستی و به‌رامبه‌ر ته‌نیشت خه‌سته‌خانه‌ی مناڵان . ئێستا كراوه‌ به‌ گه‌نجینه‌ی ده‌رمان.
١٧ ـ گردی فه‌قێیان : له‌ پشتی مزگه‌وتی كانی ئاسكانه‌ و وه‌ختی خۆی فه‌قێكان و مه‌لاكان یاریان تێدا كردووه‌. ئێستاكه‌ شوێنی مزگه‌وتی شافیعی و ته‌لاری ئازادی مۆڵ به‌رامبه‌ر پاركی ئازادیه‌.
١٨ ـ گردی شێخ ئه‌حمه‌دی هندی : ئه‌م گرده‌ به‌رامبه‌ر به‌رامبه‌ری كارێزه‌ ووشكه‌ له‌ پشت به‌نزینخانه‌كه‌ی شێخ ئه‌حمه‌دی هندیه‌.
١٩ ـ گردی قۆریه‌ شكاو : له‌ پشتی ئاوی قۆریه‌ شكاوه‌وه‌یه‌, واتا له‌ به‌رزاییه‌كانی پشتی گه‌ره‌كی شۆرش.
٢٠ ـ گردی غاباته‌كه‌ : ئه‌میش گردی ماڵی پارێزگاره‌ (محافڤ) .
٢١ ـ گردی مسكێنان : له‌ پشتی شه‌خصی ئابڵاخه‌وه‌یه‌.
٢٢ ـ گرده‌كان ـ كه‌ گردی ( رعایه‌ شه‌باب و ئه‌و ریزه‌ گرده‌ كه‌ پێیان وتوون و ده‌ڵێن گرده‌كان.
٢٣ ـ گردی گه‌وره‌ : ئه‌و گردی گه‌وره‌یه‌یه‌ له‌ پشتی رعایه‌ شه‌بابه‌وه‌یه‌.
٢٤ ـ گردی كه‌ر تڕێنه‌كه‌ : له‌به‌رده‌می خانووه‌كانی كارگه‌ی جگه‌ره‌كه‌وه‌یه‌, پشتی مزگه‌وتی حاجی محه‌مه‌دی كۆڵه‌كه‌ له‌سه‌ر جاده‌ی سالم.
٢٥ ـ گردی موشیراوا : له‌ پشتی كارگه‌ی سه‌هۆڵی قه‌ندیل و خوار مۆزه‌خانه‌كه‌یه‌ پشتی ته‌لاری سالم.
٢٦ ـ گردی شێخ فه‌تاح : به‌رامبه‌ر گردی شێخ محێدینه‌ كه‌ گۆرستانه‌.
٢٧ ـ گردی شێخ محێدین : له‌ پشتی مۆزه‌خانه‌كه‌وه‌یه‌ , كه‌ گۆرستانه‌.
٢٨ ـ گردی گۆره‌ جووله‌كه‌ : سه‌رو جووله‌كان و خوار یاریگای په‌روه‌رده‌یی ئیداره‌ محه‌للیه‌وه‌یه‌, له‌ كۆندا گۆرستانی جووله‌كان بووه‌.
٢٩ ـ گردی كاك ئه‌حمه‌دی بۆن خۆش : خوار گۆره‌ جووله‌كه‌.
٣٠ ـ گردی شێخ هه‌باس : خوار جووله‌كان.
٣١ ـ گردی حاجــی مه‌لا عه‌لی : به‌رامبه‌ر ده‌باخانه‌كه‌یه‌. خوار ده‌ستاره‌كه‌ به‌ ده‌سته‌ چه‌پدا شوێنی گه‌ره‌كی حاجیاوه‌.
٣٢ ـ گردی زێرینۆك : ڕێگه‌ كۆنه‌كه‌ی هه‌ڵه‌بجه‌ پێشی گردی كانی بــا, به‌ ده‌سته‌ راستا به‌ره‌و تانجه‌رۆ.
٣٣ ـ گردی كانــی بـــا : دوای گردی زێرینۆكه‌.
٣٤ ـ گردی پیر میكایل : به‌رامبه‌ر سه‌لیم به‌گ پشتی دێی هۆمه‌ره‌ كوێره‌.